Qazaxıstanın paytaxtı Astanada güləş üzrə dünya çempionatı davam edir.
Omnisport.az xəbər verir ki, yarışın yeddinci günündə sərbəst güləş üzrə 61, 70, 86 və 125 kq-da finalçılar bəlli olub.
Nürəddin Novruzov (61 kq) qazaxıstanlı Assil Aytəkinlə 1/8 final görüşündə son saniyədə rəqibinə xal verərək minimal fərqlə məğlub olub – 4:5.
Kənan Heybətov (70 kq) ukraynalı Vasil Şuptarı (8:2) mübarizədən kənarlaşdırsa da, 1/4 finalda amerikalı Zeyn Reterforda uduzub – 0:7.
Arseniy Djioyev (86 kq) Bəhreyn təmsilçisi Xıdır Saypudinovla (7:1) hindistanlı Puşpender Dalal (7:2) üzərində inamlı qələbə qazanıb. Yunanıstanın dünya və Avropa çempionu Georgios Kugiumtsidislə qarşılaşma isə gərgin mübarizə şəraitində keçib. Rəqibini 3:1 hesabıyla üstələyən Djioyev yarımfinala adlayıb. Arseniy finala gedən yolda gürcüstanlı Vladimeri Qamkrelidzeyə şans verməyib – 9:1. İlk dəfə böyüklər arasında dünya çempionatının finalına yüksələn güləşçimiz sabah həlledici görüşdə amerikalı 2 qat olimpiya mükafatçısı və 4 qat dünya çempionu Kayl Deyklə üz-üzə gələcək.
İkiqat Avropa çempionumuz, dünya çempionatının gümüş medalçısı Giorgi Meşvildişvili (125 kq) monqolustanlı Nambardaqva Batbayaranı (10:0) vaxtından əvvəl xalçadan məyus yola saldıqdan sonra türkiyəli Hakan Büyükçınqıla 10:1 hesabıyla qalib gəlib. Yarımfinalda rusiyalı Abdulla Kurbanova (0:5) məğlub olan Giorgi sabah bürünc medal uğrunda görüşə çıxacaq.
